Anvwaye espesyal Etazini pou Ayiti a Daniel Foote pa dakò ak fason administrasyon Biden nan ap trete Ayisyen epi remèt demisyon l
Se ak gwo desepsyon epi tou anpil ekskiz mwen prezante bay sila yo kap chache chanjman veritab, mwen demisyone nan pòs mwen kòm anvwaye espesyal pou Ayiti. Demisyon saa aplikab touswit. Se sa diplomat la ekri nan yon lèt li voye bay sekretè deta ameriken an Antony Blinken nan dat 22 septanm 2021.
« Mwen pap asosye nonm ak desizyon san kè, ki pap bay rezilta peyi Etazini pran pou chase plizyè milye refijye ayisyen, imigran ilegal- voye yo tounen nan peyi Dayiti », yon peyi kote responsab ameriken yo yo menm ap viv kache nan yon seri konplèks batiman sekirize akoz danje gang ak zam reprezante chak jou pou lavi moun. Se Daniel Foote kap pale toujou.
Fason nou abòde politik la vizavi Ayiti gen anpil feblès, apwòch nou an pabon. Sak pi rèd la rekòmandasyon mwen fè yo nou pa bayo valè, nou mete yo sou kote, gen pafwa menm nou chanje sam diyo epi nou di afè panou, daprè konpreyansyon panou.
Pèp Ayisyen an kap kwoupi nan lamizè, kap viv nan laperèz fas ak zak kidnaping,vòl ak masak bandi ak zam epi tou kap soufri anba yon gouvènman kowonpi ki fè alyans ak gang pap kapab sipòte pou nap pimpe tounen plizyè milye migran kap rive san manje, san konnen kote yo pral rete, san lajan nan pòch yo. Saa se yon trajedi anplis ki taka evite. Pilwen nan lèt la Daniel Foote di nap site :
« Leta ayisyen ki plat atè a pakapab asire sekirite, alewè pou minimòm sèvis yo epi plis refijye nap voye tounen se plis pral gen dezespwa ak kriminalite nan peyi a. Fòk nou konnen ap gen plis moun toujou ki pral tante travèse fwontyè pou antre lakay nou lè nap aji nan fason kap ogmante mizè a ki deja inakseptab nan peyi Dayiti ».
Ayisyen yo bezwen yon èd prese prese pou gouvènman an kapab rejwenn mwayen pou pran kontwòl gang yo epi pou polis nasyonal la fè lòd retounen. Ayisyen yo bezwen yon akò tout bon ant sosyete sivil la ak aktè politik yo ak sipò entènasyonal la pou trase vrè chimen ki pral pèmèt yo chwazi pwochen prezidan yo ak moun ki dwe al nan palman an nan fason demokratik.
« Ayisyen yo bezwen èd imanitè, yo bezwen lajan pou rive pèmèt moun jwenn vaksen kont kowonaviris, gen anpil lòt bagay yo bezwen toujou ».
Men sa zanmi ayisyen nou yo vle, sa yo vrèman bezwen, se opòtinite pou trase pwòp chimen yo san se pa tchoul entènasyonal kap di yo sa pou yo fè, san se pa kèk kandida ki gen gwo privilèj pandan lòt pa jwenn anyen men se sitou yon bon kout men yo bezwen.
« Mwen pa kwè Ayiti kapab jwi estabilite toutotan sitwayenl yo pa rive gen posibilite pou chwazi nan tout diyite pwòp dirijan yo nan fason ki jis epi akseptab ».
Semèn pase a anbasad Etazini ak reprezantan plizyè lòt peyi nan Pòtoprens pibliye yon lòt deklarasyon piblik pou soutni premye minis desakto Ariel Henry kòm chèf peyi Dayiti pou yon ti bout tan epi yo kontinye ap bay akò politik li ya plis enpòtans pase yon lòt akò ki pi laj, ki te la anvan, sosyete sivil la te inisye.
« Ògèy saa ki fè nou kwè se nouk tadwe ap chwazi moun ki genyen an, yon fwa ankò, ògèy saa depase lèbòn. Kantite entèvansyon politik entènasyonal la fè nan peyi Dayiti toujou pote rezilta katastwofik. Fòk nou konnen tout tan gen enpak ki pi negatif sou Ayiti yap gen konsekans tèt chaje non sèlman nan peyi Dayiti men tou ozetazini ak lakay tout vwazen nou yo ki nan rejyon amerik la ».
Se konsa anvwaye espesyal ameriken an fini lèt saa li voye bay siperyè yerachik li ki se sekretè deta Antony Blinken epi li kopye tou divès lòt diplomat ki nan depatman deta tankou sekretè deta an apre pou zafè politik, asistan sekretè deta pou emisfè oksidantal ak Kennett Merten kite anbasadè nan peyi Dayiti. Lèt demisyon Daniel Foote la al jwenn tou prezidan komisyon afè etranjè nan chanm depite a ozetazini ki se reprezantan Grégory Meek.
